Sir 5
1ⲙⲡⲣⲕⲁϩⲧⲏⲕ ⲉⲛⲉⲕⲭⲣⲏⲙⲁ ⲙⲡⲣϫⲟⲟⲥ ϫⲉ ⲥⲉⲣⲱϣⲉ ⲉⲣⲟⲓ ϩⲙ ⲡⲁⲱⲛϩ 2ⲙⲡⲣⲟⲩⲁϩⲕ ⲛⲥⲁ ⲡⲉⲕϩⲏⲧ ⲁⲩⲱ ⲧⲉⲕϭⲟⲙ <ⲉⲧⲣⲉⲕⲙⲟⲟϣⲉ ϩⲛ ⲛⲟⲩⲱϣ ⲙⲡⲉⲕϩⲏⲧ> 3ⲙⲡⲣϫⲟⲟⲥ ϫⲉ ⲛⲓⲙ ⲡⲉⲧⲛⲁϭⲙϭⲟⲙ ⲉⲣⲟⲓ {ⲉⲧⲣⲉⲕⲙⲟⲟϣⲉ ϩⲛ ⲛⲟⲩⲱϣ ⲙⲡⲉⲕϩⲏⲧ} ⲡϫⲟⲉⲓⲥ ⲅⲁⲣ ϩⲛ ⲟⲩϫⲓⲕⲃⲁ ϥⲛⲁϫⲓⲕⲃⲁ ⲛϩⲏⲧⲕ 4ⲙⲡⲣϫⲟⲟⲥ ϫⲉ ⲛⲧⲉⲣⲓⲣⲛⲟⲃⲉ ⲛⲧⲁⲟⲩ ϣⲱⲡⲉ ⲛⲁⲓ ⲡϫⲟⲉⲓⲥ ⲅⲁⲣ ⲟⲩϩⲁⲣϣϩⲏⲧ ⲡⲉ 5ⲙⲡⲣⲣⲁⲑⲟⲧⲉ ϫⲉ ⲉⲥⲛⲁⲕⲱ ⲉⲃⲟⲗ ⲁⲩⲱ ⲛⲅⲟⲩⲉϩⲛⲟⲃⲉ ⲉϫⲛ ⲛⲉⲕⲛⲟⲃⲉ 6ⲙⲡⲣϫⲟⲟⲥ ϫⲉ ⲛⲁϣⲉⲧⲉϥⲙⲛⲧϣⲁⲛϩⲧⲏϥ ⲁⲩⲱ ϥⲛⲁⲕⲱ ⲉⲃⲟⲗ ⲙⲡⲁϣⲁⲓ ⲛⲛⲁⲛⲟⲃⲉ ⲉⲣⲉⲡⲛⲁ ⲅⲁⲣ ⲙⲛ ⲧⲟⲣⲅⲏ ⲛⲧⲟⲟⲧϥ ⲁⲩⲱ ⲡⲉϥϭⲱⲛⲧ ⲛⲛⲏⲩ ⲉϫⲛ ϩⲉⲛⲣⲉϥⲣⲛⲟⲃⲉ 7ⲙⲡⲣⲱⲥⲕ ⲉⲕⲉⲧⲕ ⲉⲡϫⲟⲉⲓⲥ ⲙⲡⲣϯⲟⲩϩⲟⲟⲩ ⲛⲥⲁ ⲟⲩϩⲟⲟⲩ ⲧⲟⲣⲅⲏ ⲅⲁⲣ ⲙⲡϫⲟⲉⲓⲥ ⲛⲛⲏⲩ ϩⲛ ⲟⲩϣⲥⲛⲉ ⲛⲅⲧⲁⲕⲟ ϩⲙ ⲡⲉⲩⲟⲉⲓϣ ⲙⲡϫⲓⲕⲃⲁ 8ⲙⲡⲣⲕⲁϩⲧⲏⲕ ⲉϩⲉⲛⲭⲣⲏⲙⲁ ⲛϫⲓⲛϭⲟⲛⲥ ⲛⲥⲉⲛⲁϯϩⲏⲩ ⲅⲁⲣ ⲁⲛ ⲙⲙⲟⲕ ⲗⲗⲁⲁⲩ ϩⲙ ⲡⲉϩⲟⲟⲩ ⲙⲫⲓⲥⲉ 9ⲙⲡⲣϣⲱϣ ⲙⲛ ⲧⲏⲩ ⲛⲓⲙ ⲙⲡⲣⲙⲟⲟϣⲉ ϩⲓ ϩⲓⲏ ⲛⲓⲙ 10ϣⲱⲡⲉ ⲉⲕⲧⲁϫⲣⲏⲩ ϩⲛ ⲧⲉⲕⲙⲛⲧⲣⲙⲛϩⲏⲧ ⲁⲩⲱ ⲡⲉⲕϣⲁϫⲉ ⲙⲁⲣⲉϥϣⲱⲡⲉ ⲉⲟⲩⲁⲁ ⲡⲉ 11ϣⲱⲡⲉ ⲉⲕϭⲉⲡⲏ ⲉⲥⲱⲧⲙ ⲁⲩⲱ ⲛⲅϫⲉⲛⲉⲕϣⲁϫⲉ ϩⲛ ⲟⲩⲙⲛⲧϩⲁⲣϣϩⲏⲧ 12ⲉϣϫⲉ ⲛⲧⲕⲟⲩⲙⲛⲧⲣⲙⲛϩⲏⲧ ⲁϫⲓⲥ ⲙⲡⲉⲧϩⲓⲧⲟⲩⲱⲕ ⲉϣⲱⲡⲉ ⲙⲙⲟⲛ ⲕⲁⲧⲉⲕϭⲓϫ ⲉⲣⲛ ⲣⲱⲕ 13ⲉⲣⲉⲡⲉⲟⲟⲩ ⲅⲁⲣ ⲙⲛ ⲡⲉⲥⲱϣ ϩⲛ ⲧϭⲓⲛϣⲁϫⲉ ⲁⲩⲱ ⲡⲗⲁⲥ ⲙⲡⲣⲱⲙⲉ ⲡⲉ ⲡⲉϥϩⲉ 14ⲙⲡⲣⲧⲣⲉⲩⲙⲟⲩⲧⲉ ⲉⲣⲟⲕ ϫⲉ ⲡⲣⲉϥⲕⲁⲥⲕⲥ ⲁⲩⲱ ⲙⲡⲣⲧⲣⲉⲩϭⲱⲣϭ ⲉⲣⲟⲕ ϩⲙ ⲡⲉⲕⲗⲁⲥ ⲟⲩⲛⲧⲉⲡⲣⲉϥϫⲓⲟⲩⲉ ⲅⲁⲣ ⲟⲩϣⲓⲡⲉ ⲁⲩⲱ ⲟⲩⲛⲟⲩⲁⲣⲓⲕⲉ ⲉϥϩⲟⲟⲩ ϩⲙ ⲡⲉⲧⲟ ⲗⲗⲁⲥ ⲥⲛⲁⲩ 15ⲙⲡⲣⲣⲁⲧⲥⲟⲟⲩⲛ ϩⲛ ⲟⲩⲛⲟϭ ⲙⲛ ⲟⲩⲕⲟⲩⲉⲓ (cap 6 v 1) ⲉⲡⲙⲁ ⲛⲧⲣⲉⲕⲣϣⲃⲏⲣ ⲙⲡⲣⲣϫⲁϫⲉ ⲡⲣⲁⲛ ⲅⲁⲣ ⲉⲑⲟⲟⲩ ⲉϥⲛⲁⲕⲗⲏⲣⲟⲛⲟⲙⲉⲓ ⲙⲡϣⲓⲡⲉ ⲛⲙ ⲡⲛⲟϭⲛⲉϭ ⲧⲁⲓ ⲧⲉ ⲑⲉ ⲙⲡⲣⲉϥⲣⲛⲟⲃⲉ ⲗⲗⲁⲥ ⲥⲛⲁⲩ
Copyright information for
CopSahBible2